BANDUNG, TRIMEKAR – Bupati Sumedang, Dony Ahmad Munir, senen pasosore (25/11) nyakseni pagelaran dramatari di gedong “teater tertutup” Taman Budaya Jawa Barat di Bandung.
Pagelaran dramatari anu mintonkeun lalakon Harisbaya “Prahara Gita Cinta” teh, mangrupa garapan Studio Tari Indrawati Bandung.
Samemeh prung pagelaran dramatari, dipintonkeun heula sahiji seni unggulan Kabupaten Sumedang nyaeta seni umbul.
Bupati Sumedang, Dony Ahmad Munir, dina biantarana nyebutkeun, yen Ratu Harisbaya teh taya lian garwana Prabu Geusan Ulun raja Sumedanglarang.
Basa karajaan Pajajaran runtag anu neruskeunana teh nyaeta Sumedanglarang.
Salah sahiji titinggal Pajajaran anu dipasrahkeun ka Geusan Ulun nyaeta Mahkota Binokasih Sanghyangpake, nu kiwari aya di musium Geusan Ulun Sumedang.
Pagelaran dramatari anu didukung ku puluhan seniman jeung seniwati ti Studio Tari Indrawati, pingpinan Indrawati C Lukman teh, matak pogot nu lalajo.
Boh Tina jihat tarian, busana, seni artistik tur estetikna estu mulus.
Dramatari mangrupa “genre” drama anu ku mangrupa tari nu jadi media utamana. (ts/forkowas)***
Foto : Bupati Sumedang, Dony Ahmad Munir (ka dalapan ti kenca, jajaran tukang) dipoto bareng para seniman seniwati dramatari jeung Tari umbul, sarengsena pagelaran.
